పడిగాపులు----- రావెల
===================================

నాలుగు వానచినుకులను గుప్పెట్లోపెట్టుకుని
నాశిశిరహృదయంలో వసంతాభిషేకం చేసుకుని
తరించాలని తహతహ లాడాను.

నాలుగు కుండపోతలను బుంగలోకెత్తుకుని
నాఇంటిచుట్టూ ఆనందంగా
 ప్రదక్షిణ గావించాలని
అనేకానేకమైన కలలుగన్నాను.


వర్షపాతాన్నంతటినీ
చుక్కకూడా పారుబోకుండా
నా కావిడిలోకెత్తుకుని
నాపంటపొలంచుట్టూ
పనిగట్టుకుని మొక్కలకు కొద్దికొద్దిగా
జల్లుకుంటూ నృత్యంచేయాలని
ఎంతగానోఅభిలషించాను.

అందుకే నాచూపులనన్నింటినీ ఆకాశానికే
అతికించి ఆశగా ఆవానతుంపర్లకోసం
అనవరతం ఎదురుచూస్తూ కాలాన్ని ఖర్చుచేసుకుంటున్నాను.
ఇక వరుణదేవుడికరుణకోసమే పడిగాపులుగాస్తున్నాను.